Ràdio País Gèrs

Dissabte lo 23 de mars lo vilatge gersés de Montesquiu qu’arcuelhè l’edicion ueitau de la Prima deus Contaires. Organizat per l’associacion Ràdio País Gèrs en Gasconha dab lo sostien de l’IEO 32, aqueth hestenau qu’ei dedicat aus contes e contaires. Lo còr de la hèsta que pataqueja au ritme deu concors d’expression orau gascona. Augan, aqueste qu’estó dividit en tres categorias : Joens, amators e professionaus.

Au clavar deu vrespe qu’ac podèvan díser : la prima deus contaires qu’estó tanben la primavèra de la lenga ! La sala d’estar tan plea mancava de cadièras entà arcuélher lo public. Lo monde que podón profieitar de prestacions de grana qualitat. Los joens — qui vienèvan deus collègis de Masseuva, de Mauvesin e d’un talhèr de teatre deu medish lòc — qu’estomaguèn l’assisténcia per la lor mestreja de la lenga e ua mesa en scèna suenhada. Entà çò qui ei de la categoria amators que cau soslinhar ua participacion numerosa e la vienuda de navèths concorrents qui s’i hasèn entau prumèr còp. Poesias, cants, scenetas o contes, nombrosas fòrmas d’expressions qu’estón perpausadas. Lo prèmi deu Capdau deu Conselh Generau — prèmi a la creacion — qu’estó atribuit a quate joens qui presentèn peu prumèr còp ua peçòta suu tèma "24 òras shens electricitat".

Lo concors que s’acabè dab los professionaus, qu’ei a díser los qui an jà la costuma de contar. Per torn, lo Bernat contaire, Lo Max bajolle, lo Felip Barrèra e lo Bertand Dutilh que contèn a la lor mòda. Lo Bernat Contaire que ganhè l’empont deu salon deu libe d’Aush e lo Felip Barrèra ua residéncia artitistica au Taulèr deu Gat d’Aush. Aabans ua pora farcida plan ganhada, Guilhèm Lopez e Bernat Cauhapè que devisèn dab lo public suu lor tribalh "Imaginaire". Aquesta bèra jornada que s’acabè dab bèths tròçs d’arríders mercés a l’espectacle deus "Frères Carel". L’edicion ueitau de la Prima deus Contaires qu’estó lhèu la mei escaduda de totas, daubuns que s’ac disèvan.