CòrnabarriuEn l'encastre deu son engatjament seguit tà deféner los drets deus migrants, Alternativas europèas qu'a aviat, en collaboracion dambe Migreurop e ua coalicion europèa d'organizacions, la campanha "Open Acces now" qui reclama l'accès aus centres de detencion ende las organizacions de la societat civila e endeus jornalistas.
Atau, uns membres deus hialats Educacion Sense Frontèras e Arcuelh Sense Frontèras de Gèrs que participèn lo 4 d'abriu a la campanha de visitas aus centres d'embarrament deus estrangèrs en Euròpa qui se debanava deu 26 de març dinc au 6 d'abriu. Los militants de Gèrs que demandèn lo dret d'entrar dihens lo Centre de Retencion Administrativa de Còrnabarriu situat en cap de pista de l'aeropòrt de Tolosa-Blanhac. Nat panèu de sinhalizacion, nat parcatge. Los centres de retencion que son los lòcs d'embarrament mei inaccessibles de França.
Prumèr, que cau èster pacient, tostemps la medisha sonsaina : trindar a l'entrada...aténder...devisar dambe lo personau deu centre (la polícia de las Frontèras)....aténder, de còps ua ora o mei.... e se véser arrefusar l'entrada ! Que cau sàber qu'an lo dret d'entrar los parlamentaris e sonque. Pr'aquò qu'existish ua solucion : nat centre de retencion non pòt pas arrefusar ua visita tà ua persona designada peu son nom. Mès, per definicion, los clandestins que son monde complètament desconeguts... Alavetz mercés a visitaires qui sortishen o a la CIMADE (associacion qui òbra en centres de retencion tà hornir ajuda juridica) que's pòden arrecaptar quauques noms. Los militants de Gèrs que n'avèvan obtengut un detzenat e podón visitar uas personas embarradas. Los grops de visita que comptan tres personas au maximum. Fabiana Vayrette endeu hialat Educacion sense Frontèras deu Gèrs, Jean Falco, elegit municipau d'Aush e Joan-Marc Sutto ende Ràdio País que podón encontrar Cecilia ua peruviana de 27 ans que demòra en Italia dambe la mair e que tribalha en ua agencia de viatge a Milan dambe un CDI. Qu'anava visitar lo frair espitalizat a Madrid end'un cancèr quan la polícia de las frontèras pujèc en lo son tren (lo Milan-Barcelona) a l'estanc de Perpinhan. Se'n seguiscoc un contròle d'identitat ; la polícia que considerèc qu'èra en situacion illegala suu territòri francés e l'embarrèn au CRA de Còrnabarriu...
Un second grop compausat de Felip Espinasse, deu hialat educacion sense frontèras 32 e de Guilhèm Latrubesse, elegit au conselh regionau Miejorn-Pirenèus, qu'avoc la permission d'encontrar ua auta "retenguda". Aquesta persona de 53 ans tanben de nacionalitat peruviana, qui viu a Barcelona dambe lo hilh, qu'èra anada encontrar amics en Italia dambe la veitura e, en tot tornar, que se hascoc controlar per la policia de las frontèras a quauques centenats de mètres deu son país d'arcuelh... Acabèc lo viatge au Centre de Retencion Administrativa de Còrnabarriu...
Visitaires que's seguishèvan davant l'interfòne end'anar encontrar un amic, un parent, un collèga de tribalh. Mehmet, un kurde de nacionalitat turca demorant a Vilafranca de Lauragués, que venguèva tà véser Inan, lo frair arrestat dins la carrèra i a un mes, establit en França dempèi 3 ans mès qui n'a pas enqüèra papèrs e qui non parla pas tròp plan lo francés. Amarum e desespèr que's legissèvan en los uelhs de Mehmet ; que'ns digoc la mauhisança cap a las autoritats francesa e lo fatalisme deus kurdes qui non son pas enlòc en patz : ni en Turquia ni mès en Siria, ni mès en Iraq ni tanpòc en França.
Los estatjants deu parçan deu centre de retencion, organizats en un "Aròu deus vesins", que son en "prumèra linha" ; ua aficheta pegada a la barralha que balha quauquas entresenhas en mantua lenga dambe numèros de telefòne ende que los "retenguts" alargats (quauque còp a boca de nèit) posquen trobar un arcuelh, un teit, un mejan de transpòrt... Brac : un pauc d'ajuda !
Ua jornada s'acaba, militants e elegits de Gèrs se'n tornan. Doman d'autes que seguiràn tà hèr brut davant lo Centre de Retencion de Còrnabarriu ende non pas desbrembar, end'ajudar, ende testimoniar, ende que los "retenguts" non sian tractats coma criminaus quan non son pas que monde coma vos e jo.